الاستقلالي عادل بنحمزة عن حرب الكراسي مع العاطلين: عندنا مشكل مع كحل الراس وكنطلبو السماحة (تسجيل صوتي)

كتب بواسطة على الساعة 17:24 - 21 ديسمبر 2012

 

محمد محلا

حزب الاستقلال في تجمع خطابي في إمنتانوت هجمو عليهم العاطلين ولكن لقاو القياديين عبد الله البقالي وعادل بنحمزة لهم بالمرصاد، ودافعو على الحزب بالكراسي.
عادل بنحمزة، وفي حوار مع موقع “كيفاش”، قال أن المشكل الوحيد اللي عند الحزب هو مع “كحل الراس”، وطلب السماحة وسامح العاطلين.

 

مبروك الكرسي الجديد؟
الله يبارك فيك.

 

الناس كيتقلدو المناصب والكراسي ونتوما شفناكم هاد الأيام مضاربين بشي كراسى. ياك لاباس؟
لا لا والله ما عندنا شي مشكل، عندنا المشكل مع كحل الراس.

 

مالو؟
بعض الخطرات كيسخن عليه الراس والصلاة على النبي.

 

آش دارو ليكم؟
حنا كان عندنا تجمع خطابي ديال حملة انتخابية للانتخابات الجزئية في إقليم شيشاوة، كان مبرمج مهرجان خطابي عادي، وهاد المجموعة ديال الناس كاين فيهم اللي في جمعية المعطلين وناس آخرين لا علاقة لهم بالمعطلين، دارو بيان نهار 10 دجنبر، كيقولو فيه أنهم غادي يمنعو أي تجمع انتخابي بإمنتانوت، وحاصرو حافلة الحزب وحاولو يحرقوها والسلطة المحلية ما تدخلاتش، وحنا نضمنا هاد التجمع واعتبروه تحدي ليهم. المسؤولية الأولى ديال عامل الإقليم اللي بقا كيتفرج والسلطة المحلية والسلطة الإقليمية اللي ما دارت حتى مجهود.

 

وا السي بنحمزة معروف عليك راك ضريف، وشفناك هاز الكراسى. كيفاش زعما؟
أنا والله حتى ضريف، ولكن عاوتاني فوق طاقتك لا تلام. وحقيقة حنا كلنا دزنا من العطالة وكنعرفو وضعية الإخوان ويلا وقعات شي حاجة كنطلبو السماحة وكنسمحو ليهم، ولكن لا يعقل أن شي واحد عندو شي قضية يمكن يفرضها على الناس ويمنعهم على حقهم.

 

ها العاطلين ولاو قارين في حزب الاستقلال حسيفية. مالهم معاكم ولا مالكم معاهم؟؟
لا لا ما عندنا حتى مشكل مع العاطلين، كلهم خوتنا وحبابنا ما عندنا حتى مشكل. أول مشكل كيوقع لينا في تجمع انتخابي هو هذا في إمينتانوت.

 

ما كتشوفش باللي هاد الملف ديال العاطلين فيه شي عفاريت وتماسيح؟؟
وا شوف أخويا أنا ماشي من صحاب التماسيح والعفاريت، الإشكالية هي ديال طبيعة الاختيار الاقتصادي ديال البلاد.

 

سمعنا شباط قال للعاطلين سيرو دعيو بنكيران، لاش ناضو جاو عندو؟
لا، شباط ما قالش هو هاد الهضرة في هاد السياق، هو تكلم على المحضر، أما مجموعة إمنتانوت ما معنياش بهاد المحضر.

 

ما رأيك؟
أنشر الفيديو إذا أعجبك
أعجبني
لم يعجبني
محايد
التعليقات
4
  1. slaoui Med

    Nos politiques sont pitoyables .C’est pour ça qu’ils ont récolté une gifle :le taux de participation

    Aux prochaines élections , si ça continue on aura un taux de 15%

    إجابة
  2. andcmimintanout

    الحقيقة السي عادل بن حمزة انكم انتم الذين هاجمتم المعطلين اثناء محاولة قطع اللافتة ، وثاني انتم من هاجمتمونا بالكراسي ولم نهاجمكم وكانت لكم ضربة سياسية كبيرة على الصعيد الوطني .
    والمسالة الثانية السي بن حمزة تقولون ان الجمعية اصدرت بيانا لمنع اي تجمع خطابي لاي حزب ، وهذا كذب وافتراء من اجل نبل تعاطف الراي العام ، واذا كان ذلك صحيحا فهاتوا لنا بنسخة من البيان او البلاغ الذي اشرنا فيه الى منع .
    المسالى الثالثة بخصوص الجمعية انها قالتى في تجمعاتها انها ستفـــــــضح ولسي ستمنع – وفرق كبير بين الفضح – لذلك هجمتم بالكراسي لانكم تفضحتوا . عن طريق النقاش مع الجماهير التي حضرت الى المكان .

    إجابة
  3. andcmimintanout

    المسالة الرابعة قلت ان المعطلين يريدون احراق الحافلة : هي حنا فسيدي بوزيد او في سوريا . هذه هدرة خاوية قلها فالبرلمان
    ام من جهة المعطلين والمحضر وديك الهدرة كلها غير بغيتو اركبوها سياسيا ، لكن المعطلين عارفين سوارهم مزياان وهما الي اعلموك السياسة .
    واشار صاحبك فبعض الجرائد الصفراء ان المعطلين هاجموطكم بالسيوف والهراوات كيما درتو فاكادير عند سيدكم بنكيران . وكاع ماشفنا جرحى فيكم المنافقين
    كاع ما حشمتو بعدا جاين تقول لينا راه مرشحنا الرحيمي مناضل وهو لي خدام لكم : حنا الي كانعرفوا الرحيمي كثر منكم والى الفلوس عمات لكم البصيرة

    إجابة
  4. r4i

    I am so grateful for your article. Much obliged.

    إجابة

إضافة تعليق