الله ينزل عليكم.. الدستور!!

كتب بواسطة على الساعة 17:56 - 23 نوفمبر 2012

الفقيه بوصنطيحة

شكرا جزيلا السي فوزي بنعلال. بفضلك فهمت واحد الحاجة هادي أكثر من عام وهي ضاراني فراسي. تنزيل الدستور، تنزيل الدستور، تنزيل الدستور، تنزيل الدستور… حاولت نفهم شنو هو هاد تنزيل الدستور، ومرة ومرة كنطلع راسي للسما كنقلب على الفصول طايرة، ها الفصل 1، ها الفصل 2، ها الفصل 3، وكتسمع البرلمانيين كيقولو: شد شد شد ها واحد الفصل غادي يمشي ليك، واااا السي بنكيران الفصل 16 راه قدامك حضي معاه….

شفت مع الفقها ديال السياسة، عياو ما يشرحو لي ما فهمت والو، إلى أن نطق السي بنعلال، من أعلى منصة مجلس المستشارين، بعبارته الشهيرة: “ضريب الغرزة”، وهي دير لي طن فالراس.

تنزيل الدستور، مع ديك اللعيبة ديال “التأويل الديمقراطي لمضامين الدستور الجديد”، هي أن الواحد يجلس تحت القبة، بحال يلا جالس فشي زاوية، ويبقى يدوي وهاك أفمي وما جاب… ويلا دويتي معاك يقول ليك أنا كندير تنزيل الدستور.

الحاصول شي كينزل الدستور، وشي كينزل النيفو… الله ينزل عليكم… الدستور.

تشاو تشاو.

ما رأيك؟
أنشر الفيديو إذا أعجبك
أعجبني
لم يعجبني
محايد
التعليقات
0

إضافة تعليق