بلعوشي يقدم آخر نشرة جوية على كيفاش ويقول: تتلمذت على يد فرنسي كان كيبيع النشرات الجوية والأعاصير

كتب بواسطة على الساعة 16:14 - 16 نوفمبر 2012

 

 

محمد محلا

وقت ما نتاصلو بيه كيكون حاضر، كيجاوب في الهاتف طيلة 34 سنة من العمل في مديرية الأرصاد الجوية، وكيقول لينا أخبار الجو، وكيعرفوه كل المغاربة في الصيف والشتا. محمد بلعوشي، مسؤول التواصل في مديرية الأرصاد الجوية، في حديث مع موقع “كيفاش” بمناسبة تقاعده، قال: “ما نظنش غادي نسخا بالصحافيين وما غاديش يسخاو بيا، وعمرهم ما ضايقوني”، مضيفا: “أنا كنت مستعد لهذا الخروج، لأن التقاعد هو نتيجة لعلاقة بين الإنسان والوظيفة العمومية”.

بلعوشي، البسيط والمتواضع، ما نساش يقول لينا الحالة الجوية خلال نهاية الأسبوع، وشكر كل اللي رافقوه طيلة مساره المهني.

حتى حنا كنشكروك.

 

 

مبروك التقاعد.

(يضحك) ما نقولش ليك علينا وعليك، ولكن شكرا.

 

 

دابا واقيلا عاد غادي ترتاح من صداعنا حنا الصحافيين كلما سخن الحال ولا برد.

لا ما نظنش غادي نسخا بيهم وما غاديش يسخاو بيا، عمرهم ما ضايقوني بالعكس، كانو كيفتحو ليا بابهم وكانو كيوصلو الأمانة كيفما هي، وهادي كانت مساعدة منهم.

 

 

المغاربة مولفين السي بلعوشي يجي في الصيف يقول ليهم راه كاين الصهد وفي الشتا راه كاين البرد. دابا شكون غادي يعلم المغاربة؟

كاين مديرية التواصل اللي غادي تستمر في هاد المهمة، وأنا كنت غير موظف وسط هاد الإدارة. والخليفة لا بد غادي يكون، وهناك طاقم غادي يكون في خدمة المواطنين.

 

 

من الناس القلال اللي المغاربة ولات عندهم معاه علاقة كبيرة هو السي بلعوشي علاش في نظرك؟

كانت هادي نصيحة ديال واحد السيد تتلمذت على يدو، هو فرنسي معروف في فرنسا، وكان هو اللي كيبيع النشرات الجوية، وخاصة الأعاصير. هاد السيد طلب مني باش ديما نكون عادي ما نتصنعش لا في الصوت ديالي لا في الهندام ديالي، ونحاول، ما أمكن، نتكلم بواحد السلاسة وبواحد الوضوح وبمستوى متوسط باش كل الناس اللي كنتكلم معاهم يفهمو الكلام ديالي، وما يكونش عندي مانع باش نعاود نشرح النشرة إذا اقتضى الأمر.

 

 

 

شحال ديال السنوات قضيتي في هذه المهنة؟

تقريبا شي 34 سنة.

 

والتقاعد أمر ساهل شوية، بعد هاد المدة؟

يالاه هادي 48 ساعة ملي غادرت الوظيفة العمومية، أظن أن الإنسان غادي يولف، وأنا كنت مستعد لهذا الخروج، لأن التقاعد هو نتيجة لعلاقة بين الإنسان والوظيفة العمومية، وشبهت الوظيفة كأنها شجرة لا بد نقلمو دوك الأغصان ديالها باش تنبع أغصان جديدة وتتقوى الشجرة، وتكون فرصة لآخرين باش يعطيو داك الشي اللي بين يديهم للمواطنين.

 

 

 

ما حدك معانا السي بلعوشي كيفاش غادي تكون الحالة الجوية في هاد العطلة؟؟

(يضحك) هادي ما يمكنش نجاوبها لأن الرصد خاصو معلومة من الأرصاد الجوية. ولكن اللي توصلت بيه من الزملاء ديالي، من خلال المكالمات، فالطقس غادي يكون، إن شاء الله، مستقر باستثناء فوق المرتفعات غادي يبقاو بعض السحب العابرة، اللي يمكن تعطي تساقطات خفيفة.

 

 

 

آخر كلمة للناس اللي تابعوك طيلة هذه المدة.

سنة سعيد، وخاصة لكل من رافقني طيلة هاد المسار وبالخصوص نشد بأيدي حارة للإخوان الإعلاميين اللي برهنو ليا على المحبة والتعلق ديالهم، خصوصا في هذه الفترة الأخيرة.

ما رأيك؟
أنشر الفيديو إذا أعجبك
أعجبني
لم يعجبني
محايد