بودربالة لـ كيفاش: الزاكي هانني وعايرني وبقيت ساكت.. وغيريتس دا الفلوس.. وسنفوز على الموزمبيق

كتب بواسطة على الساعة 9:34 - 12 أكتوبر 2012

عزيز بودربالة

 

محمد محلا

أكد اللاعب الدولي االسابق عزيز بودربالة أنه لم يسبق له أن تكلم على بادو الزاكي أثناء النقاش الذي دار حول تعيين الناخب الجديد، وأن هذه الأخير هانه وسبه ولم يخرج للرد عليه. بودربالة، الذي حاوره موقع “كيفاش” قال: “لا ما كانش سوء تفاهم، يلا كان شي سوء تفاهم راه كان من جيهتو هو، أنا كمواطن مغربي وكرياضي وكتقني عطيت وجهة نظري”.

بوردبالة تحدث كذلك حول مباراة يوم غد السبت ؟ ١٣ أكتوبر؟ التي ستجمع المنتخب الوطني المغربي ومنتخب المزمبيق برسم إقصائيات كأس إفريقيا، وأوضح أن هناك أمل لتخطي التزنبيقة، وحث الجمهور المغربي على مساندة الأسود.

 

 

أول سؤال اللي 35 مليون مغربي كلهم كيسولوه، كيفاش غادي نسلكو من التزنبيقة اللي حطنا فيها إيريك غيريتس يوم غد السبت؟

(يضحك) صحيح المبارة ممكن نقول صعبة حيت خاص ننتاصرو بثلاثة أهداف وفي مقابلة معقدة، حيت غيريتس دارنا في واحد الحالة معقدة.

 

حطنا في تزنبيقة كيفما كيقولو المغاربة هذه الأيام.

تماما، لأنه يالاه الانتصار والتأهيل هو اللي غادي ينفسنا كاملين.

 

دابا وبدون لغة خشب، واش كاين شي أمل نربحو غدا ولا غير يمشيو المغاربة يساندو الطاوسي نفسيا؟

هذا ليس فيه شك، خاص نساندو الطاوسي لأنه إطار مغربي، خاد المنتخب في ظروف صعبة. ونكونو شوية واقعيين، يلا بدينا نضربو حساب للمنتخبات مثل الموزمبيق راه المسألة ولات خطيرة.

حنا متفائلين، المجموعة اللي شكلها الناخب الوطني الجديد، نفسانيا نفسات المغاربة، وحتى المجموعة الجديدة اللي كاينة أكيد غادي يعطيو نفس جديد وغادي نخرجو من عقدة كبيرة. ولو كانت نيجيريا أو غانا في هذه المقابلة ممكن غادي الإنسان يقلب على عدد من المبررات، ولكن الموزمبيق هذا أمر صعب. واعتقد أننا يمكننا تجاوز منتخب الموزمبيق وتسجيل ثلاثة أهداف.

 

أشنو هي الرسالة اللي تبغي تقول للجمهور؟

اللي بغيت نقول للجمهور المغربي، راه حنا كاملين في كفة واحدة، وواخا حنا رياضيين راه كنعيشو نفس الأزمة اللي كيعيشها الجمهور. وأنصحهم بالصبر والصبر ونساندو المنتخب الوطني المغربي، ونكونو متفائلين، وأقول أن المنتخب الوطني المغربي بإمكانو الفوز بهذه المباراة بدون إشكال لأن التأهل إلى كأس إفريقيا سيعطي تصورات جديدة واستراتيجية جديدة، وتخلي للناخب الوطني المغربي مهلة يخدم فيها على راحة، ويوجد المجموعة اللي غادي تدخل في منافسة مع الأقوياء.

 

ويلا كانت نتيجة سلبية راه خاص نعطيو مهلة للطاوسي واقيلا؟

بالفعل راه ما يمكنش يجي ناخب وطني بعد رحيل ناخب أجنبي اللي ثلاثة سنوات وهو كيتكرفص علينا، وسبنا…

 

(مقاطعا) ودا الفلوس

(يضحك) صحيح ودا الفلوس. ما يمكنش يجي ناخب وطني في مقابلة صعيبة ونحملوه المسؤولية، إذن خاص نساندوه.

 

 

ملي كان النقاش حول تعيين المدرب الجديد، كلشي تصدم فشي سوء تفاهم بينك وبين بادو الزاكي. كيفاش وقع هاد الشي؟

 

لا ما كانش سوء تفاهم، يلا كان شي سوء تفاهم راه كان من جيهتو هو، أنا كمواطن مغربي وكرياضي وكتقني عطيت وجهة نظري، السؤال اللي كان مطروح علي هو: كاين أربعة مدربين مغاربة شكون نفضل منهم؟ وعطيت وجهة نظري بأن الطاوسي هو الشخص المناسب، لأن السيد جاب لينا جوج كؤوس إفريقة وخدام ومتحمس ومتفتح وكيتواصل، أنا هضرت غير على مقابلة الموزمبيق وشكون اللي مستعد ليها، وهذا ليس معناه أنني نقصت من لخرين وما دكرتش الأسماء الأخرى.

يلا كانت وجهة نظري ضرات شي حد فراه سوقو هاداك يدير اللي بغا، أنا حر في رأيي ووجهة نظري.

الصداقة والأخوة ليست لها علاقة في مثل هذه المواقف.

 

 

دابا القلوب صافية؟

أنا قلبي صافي ما قلت حتى شي حاجة ديال العيب، أنا ما خرجتش درت حملة إعلامية ما عاير ما سبيت، تهانيت وتعايرت وبقيت ساكت، وما عنديش مشكل.

 

شي كلمة للطاوسي قبل واقعة الموزمبيق.

الله يعاونك والله يوفقك، وحنا كلنا وراه، وورا المنتخب الوطني المغربي، ونتمنى ليك التوفيق، حيت يلا ربحنا في هذه المقابلة غادي نتنفسو شوية.

 

ما رأيك؟
أنشر الفيديو إذا أعجبك
أعجبني
لم يعجبني
محايد