الزاكي لـ كيفاش: أنا باغي المعقول والمعقول ما بغاه حتى واحد وحنا ماشي فالسيرك باش يقولو الطاوسي قدم عرض والإطار الوطني ماشي بخوش

كتب بواسطة على الساعة 13:25 - 25 سبتمبر 2012

خرج الإطار الوطني بادو الزاكي عن صمته، وأوضح في حوار مع “كيفاش” الأسباب التي حالت دون عودته إلى قيادة المنتخب الوطني لكرة القدم. الزاكي أكد أنه لم يقدم شروطا مادية تعجيزية، بل إنه رفض إصرار لجنة الانتقاء على مناقشة مباراة الموزمبيق فقط، فيما هو فضل الحديث عن مشروع.

أجرى الحوار: محمد العطاري

السي بادو الزاكي آش بان ليك فهاد الشي اللي وقع؟

مجرد مسرحية… مجرد فيلم… كنت عارف أنني ماشي أنا المدرب، وقاموا بالكذب علي وعلى الشعب المغربي، لم أضع أي شروط تعجيزية لقبول تدريب المنتخب الوطني، وهي مجرد شائعات تروج سعيا للنيل من سمعتي. أنا أحظى بدعم من الشارع المغربي واللجنة الخماسية، اللي كيترأسها عبدالإله أكرم، هي اللي تناقشات معايا، وفي نقطة واحدة اللي هي مباراة العودة أمام منتخب الموزمبيق، بدل الالتفات إلى المشروع اللي قدمتو. وفي المقابل رفضت هاد الشي، وما طلبت لا عقد، وما فرضتش شروط خيالية أو تعجيزية.

قالوا باللي الطاوسي قدم عرض، وانت السي الزاكي؟

أنا باغي مشروع عمل، وقالوا الطاوسي قدم عرض، واش حنا داخلين السيرك ولا لاعبين بلاي ستايشن؟ كنت كنتمنى أن الجامعة يكون عندها مشروع وهي اللي تقدمو. قال ليك العرض، واش الطاوسي قدم المباراة ملعوبة، العرض شكل والواقع شكل آخر، راهم كيكذبو على مشروع.
الطاوسي مدرب في المستوى، وأنا غادي نكون من المساندين ديالو.

كيقول الشعب باغي الزاكي وانت آش باغي؟
(يضحك) الشعب بغى الزاكي، أنا باغي المعقول والمعقول ما بغاه حتى واحد

وبالنسبة للفلوس، شنو طلبتي؟

ما طلبت والو، اللي قلت هو أنه يكون صالير يحترم الإطار الوطني، أي أي مدرب غادي يقود المنتخب الوطني. أنا باغي الإصلاح ويرجع الانضباط والنتائج الإيجابية، ويرجع التفاؤل للشعب المغربي، ويلا مادرتش هاد الشي أجييو قولو لي الله يعاون، ماشي تقول ماتش الموزمبيق ومن بعد نهضرو، وتقزمني أمام اللاعبين والأطر الوطنية والجمهور المغربي، وماشي فاش تجي تحاور الأطر الوطنية ترجعها بحال البخوش هاذ حاجة أخرى.

شنو رأيك في مستقبل الأسود؟

أنا ما كنشككش في كفاءة الطاوسي أو اللاعبين، ولكن كننتقد بشدة احتقار الإطار الوطني. الفيلم مخدوم، ومرضو الجمهور المغربي وكذبو على الإعلام الوطني.

السي الزاكي، واش نيبت ودومو هوما السبب؟

ما ندخلش فهاذ الشي. اللي عرقل أن الزاكي ما يكونش مدرب هو الرؤية الضيقة في الجامعة وعدم الاحترام، ماشي نور الدين نيبت ماشي حكيم دومو. قال ليك باك طاح، قال ليك من الخيمة جا مايل، هناك عبث… حت تحيى الضمائر.

شنو رسالتك السي بادو الزاكي؟

رسالتي يلا بقينا بحال هاكدا ما غديش نزيدو للقدام، والشعب هو اللي كياكل العصا نزيدوه من المعاناة. أنا مع الإطار الوطني، مع المتنخب الوطني، لفرحة الشعب المغربي.

ما رأيك؟
أنشر الفيديو إذا أعجبك
أعجبني
لم يعجبني
محايد
التعليقات
5
  1. wydad

    انا من البدية ما كنتش باغيك أسي الزاكي تقبل تدريب المنتخب حيت غادي عطيوك باطو غارق باش انقصو منك حنا عارفين المشكل ماشي فاللعابة ولا فالمدربين المشكل فديك الجامعة لمسوسة اللي شبعانة فوضى

    إجابة
  2. redouane

    itooooob aba zaaki

    zaki li bghiina

    إجابة
  3. youssef

    المشكل ليس في المدرب أو اللاعبين أو الجامعة ٠ المشكل في الرقابة المفروضة على التوجه العام لرغبة الجامعة و الشعب واللاعبين الممثلة في التبعية للوبيات خفية ذات إيديولوجيات وأجندة ممنهجة ، قال تعالىـإنه يراكم هو و قبيله من حيث لا ترونهم،ـ صدق الله العظيم

    إجابة
  4. ayoub ennaji

    merci bado nta batal lo3taraf bik orak dima fl9lb massira mowafa9a m3a l wac

    إجابة

إضافة تعليق