المحلل نجيكم نيشان يكتب عن مراحيض البرلمان: الإصلاح من القاع!!

المحلل نجيكم نيشان يكتب عن مراحيض البرلمان: الإصلاح من القاع!!
بقلم: نجيكم نيشان
في الوقت اللي ناس كيتسنّاو شي إصلاح ينقص من أجور البرلمانيين، ولاّ يرشد النفقات في البرلمان، ولا يخرجو لينا باتفاق أنهم ما غاديش يتخلصو على هاد الأيام اللي غير جالسين فيها، خرج لينا البرلمان الموقر بقرار لإصلاح المراحيض.
وبغض النظر على واش الطواليط بلدية ولا رومية، وهو نقاش عميق جدا في هاد المسألة الحساسة جدا والتي تهم جل المواطنين، ممكن نتّفقو مع النواب المحترمين ديالنا على أن أي إصلاح خاصو يدار خاص يكون من القاع (وبلا ما تنويوها ناقصة حيت هاد الكلمة عربية قحة وتعني في المعجم أساس الشيء)، نبداو بالمراحيض وندوزو للدوش والريسطو والصالونات وقاعات الاجتماعات وصولا إلى قاعة البرلمان ثم إلى جيوب البرلمانيين.
ولا زربة على إصلاح، وبهاد الطريقة غادي ندوزو واحد 50 سنة غير باش نفكرو في ترشيد النفقات.
غير السؤال اللي كيدزر ليّ فبالي هو واش هاد إصلاح المراحيض غادي يخلي النواب يبقاو يجيو ديما أثناء التصويت على مشاريع القوانين، أو لا غادي يبقاو يغيبو؟

ما رأيك؟
أنشر الفيديو إذا أعجبك
أعجبني
لم يعجبني
محايد