المحلل نجيكم نيشان يكتب: حللت حتى عيت وما فهمتش شكون متحالف مع شكون!!

التحالف

أرشيف

بقلم: نجيكم نيشان
حميد شباط، اللي هو الأمين العام ديال حزب الاستقلال، تحالف مع إدريس لشكر اللي هو الكاتب الأول لحزب الاتحاد الاشتراكي. حتى لهنا ها حنا مفاهمين.
نوض أسيدي هاد حميد شباط باغي يتحالف مع عبد الإله ابن كيران، اللي هو الأمين العام لحزب العدالة والتنمية، بعدما دوزو 5 سنوات وهوما كيسبو بعضياتهم، ها مرض الكُذاب ها المنحوس ها داعش وزيد وزيد.
نوض أسيدي إدريس لشكر غادي يتلاقى ابن كيران باش يهضرو على التحالف، وهاد الشي كامل مولاه هو حميد شباط اللي داخل بخيط بيض. وتبارك الله على نسيمة الحر.
من غير هاد الشي، ناض إلياس العماري، الأمين العام ديال حزب الأصالة والمعاصرة، اللي ما عندوووووش مع ابن كيران، كتب مقال، (اليوم الثلاثاء 18 أكتوبر)، كيقول فيه باللي باغي المصالحة من أجل الوطن، من بعد أسابيع ديال والله ما نتحالفو والله ما نتلاقاو.
شي محليلين بحالي كيقولو أن لشكر باغي يتحالف حتى مع إلياس العماري.
من غير هاد الأمناء العامين كاين حزب التجمع الوطني للأحرار اللي مشى تحالف مع الاتحاد الدستوري، وهادو بزوج حتى واحد ما عارفهم فاش عينهم.
التجمع الوطني للأحرار شرطو وتشرطو على ابن كيران باش يدخلو للحكومة، وهو قال ليهم: “لا للابتزاز”.
الحركة الشعبية ناس ضريفين وغاديين جنب الحيط، متحالفين هاد الساعة مع راسهم وما قادين على صداع.
دابا يمكن فهمتو شكون اللي متحالف مع شكون؟
أنا بعدا مازال كنحاول نفهم..

ما رأيك؟
أنشر الفيديو إذا أعجبك
أعجبني
لم يعجبني
محايد